SEAK no Familia kontribui fundus Konsege Inagura Uma-Lisan Knua Orabada Kulugia Faemutu

LAUTEM,(Rapides-Info)- Secretario Estado Arte e Kultura (SEAK) apoiu fundus no kontribui husi familia sira konsege harii no halo inagurasaun uma-lisan Orabada Faemutu Kulu gia aldeia Aelafa suku Daudere Postu Administrativu Lospalos, Munisipio Lautem ne’ebe fo bensa Amu Vigararario Paroquia Lautem, no sasin direita hosi autoridade lokal, PNTL, familia tomak fetosan no umane no seluk tan.
Reprezenta Familia, Angelio Miranda esplika katak, objetivu hosi harii uma lisan refere hanesan simbolo ba familia boot ida nia hun abut no sanak sira, uma-lisan ne’e tur hamutuk familia husi ahi matan neen hanesan Orabada Be-Gia,Orabada Bibilofo,Orabada Bugua,Orabada Kewua,Orabada Lupu-rara, no lia-nain sira tau naran ba uma-lisan Salala Makaleku, tanba nia mak Uma Bo’ot ka Umakaka no konta tuir nia historia husi avo bisavo nia tempu antigo nian too mai agora.
Nune’e, nia reprezenta familia hato’o agradese ba familia hotu-hotu ne’ebe maka durante tinan ida ho balun halo servisu preparasaun komesa husi inisiu to’o konsege halo inagurasaun uma lisan nomos ba familia hotu maun alin sira ne’ebe pertense iha suku Daudere apoio tomak hanesan material no hanoin sira ne’ebe maka fo ba ami oinsa atu bele mobiliza no organiza halo servisu husi inisiu too oin loron.
“Ba ita boot sira-nia kontribuisaun makaas no ha’u nia agradese mos liu-liu ba iha bairo Almavir ne’ebe maka suporta makaas husi parte fisiku nian hodi halibur material sira komesa husi inisiu ke’e fondasi too taka duut,husi familia mos hakarak hatoo relatorio badak, prossesu tomak ne’ebe maka halo oinsa atu harii Uma-Lisan ida ne’e iha kanal orsamento sira ne’ebe maka ami hetan,kanal ida maka mai husi familia rasik no mos husi ita nia atividade ne’ebe maka hanesan Futu manu no Loke koruru husi parte familia no atividade jogu rua ne’ebe maka iha hodi hetan fundos no gasta ba Uma-Lisan ida nee kuase $12.0000 mil”, deklara nia, iha ambitu inagura uma-lisan ne’e iha Aelafa, Sabado (06/12).
Nia hatutan, fundus ne’ebe hodi harii uma lisan ne’e, la’os mai hosi familia deit, maibe mos apoiu hosi Governu liu-husi SEAK ho osamentu total hamutuk $2.0000 Mil gasta ba serimonia inagura ne;e, no osan tatol hamutuk kuase $14.0000 tal mil maka bele finaliza atividade Uma-Lisan ne’e.
Nune’e mos. Aniceto dos Santos nu’udar representante Fetosan ba Fetosan hotu-hotu husi uma-lisan Orabada Faemutu Kulu gia ne’e husu matak malirin ba nia Hun uma-lisan Orabada atu nunee simu bensaun.
“Ha’u hamriik iha ne’e representante feton no oan nian hau rasik hanesan sanak oin ne’e momento di’ak ha’u hun halibur ita fetosan umane hotu-hotu iha ne’e hodi simu matak malirin agradese ba ha’u tiun sira hun mak sira ami mak sanak ami husu matak malirin atu nunee ami sanak nee sanak ba bei-beik no abut ba bei-beik”, nia sublina.
Entretantu, Lideransa Komunitario apresia ba familia boot Uma-lisan Orabada Faemutu Kulu gia ho servisu ne’ebe organizado durante konstrusaun uma-lisan nian no representa Estado tesik Fita ba Uma-lisan nia.
“Ita hotu-hotu hatene katak, husi familia boot Orabada Faemutu Kulu gia realiza serimonia inagurasaun ba sira nia uma lisan oin, instrusaun ita rona no husi parte lian nain mos ita rona hanesan Autoridade agradese tebe-tebes ba familia boot ne’ebe maka husi Orabada organiza atividade refere ida ne’e sira nia kooperasaun entre familia no Autoridade ka lideransa Komunitario ne’ebe mai kultural liga mai Estado iha kooperasaun ne’ebe maka diak tebe-tebes hau hanesan lideransa Komunitario agradese Wain ba familia tomak nia kooperasaun servisu durante sira nia preparasaun iha fulan hira nia laran too mai oin bele finaliza sira nia konstrusaun uma-lisan ida nee ita bele inagura no mos representa autoridade munisipal no Postu ita apoio no apresia ba sira nia preparasaun”, nia Konklui.
Jornalista : Arnaldo Quintas Nunes