Alkatiri promete sei halo revizaun ba estatutu partidu FRETILIN

Dili (Rápides Info)- Sekretáriu Jerál Partidu Fretilin, Mari Bin Amude Akatiri hateten sei aprezenta proposta revizaun estatutu Partidu Frente Revolucionario Timor- Leste Independente (FRETILIN) nune’e fó biban jerasaun foun atu kaer ukun
Lider Nasional ne’e hato’o lia hirak ne’e iha ambitu konferénsia dahuluk Juventude Fretilin nian iha ne’ebé hala’o iha salaun Auditorium Kuartel Jenerál l Fatuhada Dili sabadu ohin.
Tuir nia tempu ona halo revizaun ba estatutu partidu FRETILIN nune’e fó oportunidade ba jerasaun foun atu kaer partidu.
“Fretilin sei halo Revizaun ba estatuto ho objetivu klaru, katak iha tinan lima mai atu halo tranzisaun ba jerasaun foun atu kaer ukun.Ha’u mós lakohi aban bainrua kaer aitonka mak mai koalia ho imi, ne’emak ha’u dehan iha revizaun estatutu ha’u sei aprezenta proposta ida kria orgaun ida Konsellu Tranzisaun, orgaun ida ke bele mós iha funsaun atu bele jere plataforma inklusiva interjerasionál i ampla”,nia afirma.
Eis Preimeiru Ministru ne’e mós fundamenta tan katak, Estatutu Partidu Fretilin nian ida uluk, fó biban de’it ba Prezidente partidu mak bele kandidatu ba Prezidente Repúblik no Sekretariu jeral mak ba Primeiru Ministru, maibé agora iha mudansa bo’ot.
” Estatuto uluk ne’e dehan kandidatu ba Prezidente da Repúblika ne’e prezidente partidu no Primeiru Ministro mak Sekretáriu Jerál, agora la koalia hanesan ne’e iha mudansa boot, Komite Sentrál mak sei foti, sé mak atu sai kandidatu ba Prezidente da Repúblika ba Preimeiru Ministru komisaun politika nasionál”, nia subliña.
“Tanba ne’e kamarada sira iha funsaun para deskuti buat sira ne’e hotu labele hein lideransa mak hatudu fali, hare se mak bele sai kandidatu ba prezidente no se mak bele kandidatu ba primeiru ministru” nia konklui.
Jornalista: Mateus F.de Deus