Governu entrega ona mate isin Manuel de Albuquerque neebé mout iha Tasi Tongeon Korea ba familia

DILI (Rapides- Info)- Governu liuhusi Sekretária Estadu Formasaun Profissionál Empregu (SEFOPE) kinta (8/1) ohin entrega ona mate isin Manuel de Albuquerque neebé mout iha Tasi Tongeon Korea ba familia.
Diretór Jerál Carlito do Rosario Cabral hateten, lori kolega sira husi SEFOPE ho nia estrutura funsionáriu SEFOPE tomak hakarak hato’o sentidu kondelensia sentimentu tristeza ne’ebe kle’an ba familia matebian alin Manuel de Albuquerque.
“Ita la espera akontesimentu sira hanesan ne’e akontese iha sira nia servisu fatin la’os familia mesak mak lakon ema diak ida joven diak ida, maibé SEFOPE mos lakon ema diak ida joven diak ida ne’ebé fó esperansa ba nia atu sai eroi foun ba ita- nia nasaun no mos nia familia rasik tanba nee mak SEFOPE mos senti lakon boot”, Carlito hateten iha nia intervensaun bainhira entrega traballadór Manuel Albuquerque nia mate isin husi Korea Súl ba familia iha Aerportu Internasionál Nicolau Lobato Komoro Dili kinta ne’e.
Nia dehan, matebian midar joven diak ida ne’ebe fiar nia Estadu tanba ne’e Governu haruka nia ba servisu iha ema nia rain ho objetivu ida bele kontribui ba desenvolvimentu ekonomia nasaun nian.
” Maibé Maromak nia planu oin seluk saida maka ita nia hakarak maromak deside oinseluk, maibe nee realidade ita tenke simu mesmu ita triste tanba lakon ita nia oan,ita nia maun,ita nia alin,ita nia subrinu Manuel de Albuquerquenia isin. Maibe ita fiar katak nia espiritu nafatin hamutuk ho ita nunee nia nafatin fo forsa ba ita no mos ita la bele haluha nia esforsu sira ne’ebe nia halo ba familia nia diak ba nasaun nia diak”, nia afirma.
Carlito apresia ne ba kbiit hotu-hotu ne’ebe kontribui hodi buka mate isin too lori mai Timor-Leste tanba kuase fulan ida.
Nia esplika,prossesu transladasaun ba mate isin la fasil atu hetan mate isin Estadu no familia lakon esperansa hafoin hetan mate isin.
“Dala tan prossesu sira nee la Fasil oin ami dada lia ituan ho Adidu fatin ne’ebe ita nia alin mout dook tebe-tebes husi sidade Seoul atu ba ne’eba presiza ró presiza Aviaun kareta mos tula ba ró mak foin to’o fatin ne’ebe ita nia alin hetan dezastre, tanba nee mak prossesu naruk ituan, maibé grassa Maromak ninian tulun ita bele hetan fali ita nia alin isin mate too mai familia nia liman nunee bele halot nia tuir tradisaun Timor nian”, nia afirma.
Iha fatin hanesan reprezentante família matebian Aleixo dos Santos representa maktoban Manuela De Albuquerque nia familia husu ba Estadu kria kondisaun ba nia Inan faluk no alin sira.
“Ami familia agradese mos ba Governu liu-liu SEFOPE ho nia ekipa tomak nia servisu Adidu traballu nia esforsu tomak ne’ebe maka hanesan loron kalan kontaktu iha situasaun nee obriga ita iha fora de servisu mos kontaktu nafatin no formadores maun Cornelios oin iha nee ho nia ekuipa lubuk ida nia esforsu forma joven sira ba para atu kontribui ba dezenvolvimentu. Ita lakohi hanesan nee mais realidade ida nee mak leten nia planu”, nia haktuir.
Biografia matebian Manuela De Albuquerque:
Manuel de Albuquerque moris iha Munisipio Ermera Postu administrativu Letefoho,Suku Haupu,aldeia Ria Mori,moris iha loron 11 Fulan Jullu tinan 1995,oan husi Americo dos Santos (Matebian)no Maria do Carmo.
Matebian Manuel mak hanesan oan Mane dahuluk husi maun alin nain lima (5)Mane nain haat(4)no feto nain Ida(1).
Matebian remata nia estudu iha Sekundariu iha Eskola IT iha Maliana munisipiu Bobonaru. Hahú husi tinan 2015 to’o remata iha tinan 2018 matebian hahú kursu lian Korea iha sentru kursu lian Korea iha Becora hahu tinan 2019 to’o remata.
Iha tinan 2021 matebian tuir teste komputadór Computer basic Test(CBT) iha tinan 2020 la passa maibe nia la lakon esperansa hodi kontinua estuda nafatin hodi tuir teste ba etapa daruak nian iha tinan 2021 nunee passa iha ezame.
Iha 2021 matebian hetan kontratu husi empreza iha area Peskas no aranka ba serbisu iha Korea-Sul iha loron 20 Fulan Novembro tinan 2022. Matebian serbisu iha empreza peskas nia ne’e ho kontratu serbisu ba tinan tolu semana ida.
Durante tinan tolu maatebian Manuel de Albuquerque halao serbisu hotu-hotu ho diak no halo komunikasaun diak hela ho familia no kolega sira, maibé iha loron 25 Fulan Novembro tinan 2025 anin lori lia rekadu husu nasaun Korea-Sul ne’ebe hafalun familia ho notisia tristeza ba inan faluk Maria do Carmo,Maun alin sira inklui familia sira no parente sira, nune’e mós familia bo’ot SEFOPE no Rai doben Timor-Leste katak Matebian mout iha tasi Tongeon bainhira halao hela nia serbisu ho kolega ida iha ro laran.
Ho Laloran tasi Tongeon nia rasik hasubar hela matebian durante loron rua nulu resin haat (24) iha tasi lara. Maibe ho grasa Maromak nian no esforsu sira ita ema nian hetan fali matebian nia isin iha loron 19 fulan Dezembru tinan 2025.
Jornalista: Arnaldo Quintas Nunes