Díli, (Rapides-Info)- Primeiru-Ministru (PM), Kay Rala Xanana Gusmão apresia no louva Brunei Darussalam ne’ebé kontribui ona bá páz no prosperiedade iha Sudeste Aziátiku.
Primeiru-Ministru hato’o apresiasaun ne’e iha ámbitu almoço hamutuk ne’ebé oferese hosi Liurai Brunei Darussalam, Sua Majestade Sultan Haji Hassanal Bolkiah Mu’izzaddin Waddaulah ho prezensa membru Família Reál nian, iha Istana Nurul Iman, segunda 04 Maiu 2026.
“Ami hanoin hikas ho apresiasaun bo’ot, ne’ebé ho ita-boot nia vizita bá Timor-Leste iha tinan 2024. Vizita ne’ebá reflete forsa hosi lasu sira entre ita-nia nasaun sira no vontade di’ak entre ita-nia povu sira. Brunei Darussalam iha papél importante iha ita-nia rejiaun. Liu-hosi ita-bo’ot nia lideransa no ita-bo’ot nia kompromisu bá ASEAN, Brunei Darussalam kontribui ona bá páz no prosperiedade iha Sudeste Aziátiku”, PM Xanana hateten liu-husi komunikadu Rapides info asesu, husi mídia GPM, tersa (05/05).
PM Xanana observa katak, ohin-loron mundu hasoru krize enerjétika ne’ebé provoka onda xoke sira liu-hosi ekonomia globál, tanba ne’e papél ne’e importante liu-tán.
“Ha’u elojia ita-bo’ot tanba ajuda mantein estabilidade rejionál durante krize ida-ne’e liu-hosi esportasaun mina-rai no gás ho konfiável. Enerjia hosi Brunei Darussalam ajuda ona nasaun sira atu evita interrupsaun grave hosi falta kombustível. Interrupsaun ne’ebé sei iha impaktu bo’ot liu bá sira ne’ebé vulnerável liu iha ita-nia rejiaun”, PM Xanana elozia.
Agradese Brunei Darussalam bá apoiu firme bá Timor-Leste atu adere bá ASEAN. TL nia adezaun bá ASEAN mak realizasaun aspirasaun nasionál ida ne’ebé iha kleur ona.
Nu’udár membru ASEAN, Timor-Leste oras-ne’e halo parte iha rejiaun nia komunidade ekonómiku no estratéjiku, no komprometidu atu kontribui bá páz, estabilidade no prosperiedade ne’ebé fahe.
TL sente onradu atu assume Prezidente ASEAN nian iha 2029 no hein atu servisu besik ho Brunei Darussalam iha preparasaun bá marku importante ida-ne’e.
Agradese bá amizade ne’ebé Brunei Darussalam hatudu bá Timor-Leste no bá apoiu nafatin bainhira Timor hola fatin iha rejiaun ne’e.
Lori delegasaun nia naran, PM Xanana agradese bá ospitalidade ne’ebé oferese no konsidera Timor-Leste ho Brunei Darussalam iha relasaun besik no dura.
Ekipa Rapides info
