Aileu, (Rápides -Info)- Prezidente Autoridade Munisípiu Aileu Joao sia Santos kinta (04/6) ohin hamutuk autoridade Munisípiu Aileu hatuur fatuk dahuluk ba reabilitasaun estrada Suku Seloi Malere Postu Administrativu Aileu Vila ba Seloi-Kraik Munisípiu Aileu.
Reabilitasaun estrada Suku Seloi Malere ba too Seloi-Kraik ho kilometru 3,7 ho orsamentu valór $761,833.78 ne’ebé konstrui husi empreza Aisel Girasol Unipesoal Lda.
Iha nia diskursu, PAM Aileu, João Bosco dos Santos, afirma katak orsamentu ba konstrusaun estrada ne’e mai husi Orsamentu Jerál Estadu. Tanba ne’e, nia husu ba kompañia konstrutora atu garante kualidade másima.
“Orsamentu Estadu nian. Husu ba kompañia atu garante kualidade nune’e iha futuru bele hetan nafatin konfiansa,” PAM Aileu deklara iha ambitu lansamentu reabilitasaun estrada husi Suku Seloi Malere ba Seloi Kraik kilometru 3.7 ne’ebé hala’o iha Aileu Vila kinta ne’e.
Nia akresenta katak durasaun konstrusaun sei depende ba kondisaun klima.
“Husu atu iha koordenasaun di’ak entre kompañia, Obras Públikas Munisipál, Autoridade Lokál, no komunidade atu prevene problema durante implementasaun”, nia afirma.
Nia hatutan, katak, projetu ne’e sei fó oportunidade servisu ba komunidade husi Suku Seloi Malere no Seloi Kraik.
“Karik komunidade husi suku rua ne’e lakohi servisu, bele rekruta traballadór husi suku seluk ne’ebé besik,” PAM esplika.
Iha fatin hanesan, Jestór Projetu husi Aisel Girasol Unipesoal Lda, Gimi Campos, hateten empreza sei servisu bazeia ba kontratu no presiza kontrolu másimu husi Obra Públika.
“Ami garante sei oferese servisu ho kualidade tanba projetu ne’e uza teknolojia fibra ne’ebé foin implementa dahuluk iha suku ida ne’e. Ami mós iha parseiru ne’ebé fó apoiu no sei hetan kontrolu husi Obras Públikas,” nia garante.
Ekipa: Rápides -Info
