Dili, (Rápides -Info)- Dewan Solidaritas Pemuda Pelajar Timur Timur (DSMPPTT) abertura jogu Dewan Solidaritas Cup hodi komemora ezistensia DSMPPTT ba dala-XXVIII.
Sekretáriu Jerál DSMPPTT Arquimino Ramos hateten, DSMPPTT organiza Dewan Solidaritas Cup hodi hodi komemora ezistensia DSMPPTT ba dala-XXVIII.
Nia esplika, iha Dewan Solidaritas Cup ne’e partipa husi klubu lima kompostu husi Dewan Solidaritas rasik, OJETIL (Organização de Juventude e Estudantes de Timor-Leste), Ikatan Mahasiswa dan Pelajar Timor Timur (IMPETTU) Bandung husi RENETIL, bolseiru Dewan Solidaritas no membru PNTL.
“Ohin jogu abertura ne’e Dewan Solidaristas ho OJELATIL mak jogu ohin dader.Ohin ekipa rua jogu animu tebes i ohin impata 2-2 jogu too termina”, Arquimino Ramos hateten ba Rápides -Info bainhira partisipa limpreza iha tasi ibun Praia dos Cuqueiros sabadu ohin.
Arquimino esplika, iha ambitu komemorativu Dewan Solidaritas Pemuda Pelajar Timur Timur ba dala-XXVIII ne’e iha Domingu (07/6) aban sei iha misa agradesimentu ne’ebé organiza husi DSMPPTT iha dader 8:00 ne’ebé sei hala’o iha Sentru Formasaun Polísia hodi hanoin hikas kolega sira ne’ebé uluk lakon vida Dewan nian iha 1998 too 1999.
“Hafoin missa sei ba kari aifunan. Ita husu missa ba kolega Dewan sira ne’ebé mate, depois kari aifunan iha seminteriu Santa. Depois loraik tuku 17:30 ne’e ho reflesaun iha rádiu liberdade”, nia afirma.
Ramos haktuir, tema ba reflesaun komemora loron DSMPPTT tinan ne’e mak “Dewan Solidaritas uluk, ohin no aban, ba Timor-Leste ida soberana justa no rezilente”.
Reflesaun ne’e sei hala’o iha edifisiu Rádiu Liberdade ne’ebé partisipa husi fundadór Anterió Bendito no Maria Angelina Lopes Sarmento ne’ebé ko’alia iha kalan reflesaun ne’e.
Nia dehan, objetivu foti tema ne’e atu organizasaun Dewan Solidaristas ne’ebé solidu, rezilente no prontu atu kontribui nafatin ba dezenvolvimentu nasionál.
“Tema ne’e ita foti para oinsá konsolida ita-nia membru sira hanesan uluk ninian estrutura ne’e husi nivel nasionál nivel Dewan mini Munisípiu ninian too postu administrativu estrutura ne’ebé uluk eziste, ita hakarak komemorasaun ne’e Dewan hothotu iha estrutura iha nivel nasionál too postu administrativu sei kontinua nafatin halo atividade buka oinsá kontribui ba dezenvolvimentu nasionál”, nia katak.
Ekipa: Rápides -Info
