Aileu, (Rápides -Info)-Arsebispo Metropolitana Dili Dom Virgílio Cardeal do Carmo da Silva, hatuur fatuk dahuluk ba konstrusaun Igreja Santos Arcanjos iha Suku Madabeno, Postu Administrativu Laulara Munisípiu Aileu.
Iha serimónia haktuir fatuk dahuluk hahú ho misa solene ne’ebé prezide husi Arsebispo Metropolitana Dili Dom Virgílio Cardeal do Carmo da Silva ne’ebé hala’o Parókia São Francisco Xavier de Dare, Sabadu foin lalais ne’e.
Selebrasaun eukarístika ne’e partisipa hosi autoridade sivíl no seguransa Munisípiu Aileu nian, inklui Komandante PNTL Munisípiu Aileu, Superintendente Xefe António da Luz, Prezidente Autoridade Munisípiu Aileu, João Bosco dos Santos, Administrador Postu Laulara, Izau Peregrinu Maya, inklui Xefe Suku Madabenu no Aiserimou.
Iha nia humilia, Dom Virgílio hateten ,importánsia konversaun no esperansa iha nai Maromak.
“Laiha santo ida ne’ebé laiha nia passado, no laiha ema sala-nain ida ne’ebé laiha futuru,” Dom Virgílio hateten iha nia humilia bainhira prezide misa ba konstrusaun Igreja Santos Arcanjos, iha Igreja Parókia São Francisco Xavier de Dare, Sabadu foin lalais ne’e.
Nia esplika katak santu sira mós iha pasadu ho frakeza, maibé sira la husik pasadu domina sira nia futuru.
“Nai Maromak sempre fó oportunidade foun. Maski ema sala barak, se nia fila ba Maromak ho laran hakruuk, Maromak bele muda nia vida,” nia subliña.
Hafoin misa, realiza serimónia hatuur fatuk dahuluk ba konstrusaun Igreja Santos Arcanjos de Madabenu, marka inísiu ofisiál ba konstrusaun uma-kreda foun ne’e ne’ebé sei sai sentru espirituál ba sarani Estasaun Missionário São Miguel, São Gabriel, São Rafael.
Entratantu konstrusaun Igreja Santos Arcanjos ne’e hein katak sei responde ba nesesidade espirituál sarani Madabeno no zona Laulara nian ne’ebé aumenta ba beibeik.
Ekipa: Rápides Media