Dili (Rápides -Info)- Governu Timor-Leste liuhusi Ministeriu Justisa formaliza akordu kooperasaun ho Ministeriu Justisa Governu Japaun iha área dezenvolvimentu sistema justisa.
Akordu koperasaun ne’ebé hanaran Memorandum of Cooperation (MoC), iha Tóquio, Japão asina husi Ministru Justisa Sergio Hornai ho nia ómologu Ministru Justisa Hiroshi Hiraguchi iha kinta (5/3) horseik iha Tokoyo Japaun
Asinatura ida-ne’e, etapa importante ida atu hametin relasaun koperasaun bilateral entre Timor-Leste no Japaun, liuliu iha área justisa. Koperasaun ida-ne’e mós hakarak promove troka esperiénsia, koñesimentu tékniku no kapasidade institusionál entre instituisaun relevante sira iha nasaun rua.Objetivu prinsipál hosi MoC ne’e, maka atu reforsa kooperasaun iha dezenvolvimentu sistema justisa, kapasidade rekursu umanu, no partilha prátika di’ak sira ne’ebé bele kontribui ba fortalesimentu governasaun no estadu direitu iha Timor-Leste no Japaun.
“Ha’u nia kolega, Ministru Justisa Japaun, ami asina ona dokumentu ofisiál ida-ne’e hanesan pasu estratéjiku atu hasa’e visibilidade kooperasaun entre nasaun rua, no mós atu hakat ba oin liu tan iha prosesu konsolidasaun Estadu de Direitu Demokrátiku liliu administrasaun justisa ida ne’ebé forte no kredível, tuir interese komún Timor-Leste no Japaun” Ministru Justisa Sergio Hornai hateten liuhusi Komunikadu ne’ebé Rápides asesu sesta ohin.
Iha komunikadu ne’e sita mós katak setór Justisa iha Timor-Leste no Governu Japaun, akordu kooperasaun ne’ebé realiza ohin loron, sai hanesan prova ida katak Timor-Leste no Japaun iha komprimisiu ida ne’ebé forte hodi hametin no konsolida Estadu de Direitu Demokrátiku iha nasaun rua ne’e.
“Koperasaun ida-ne’e, reflete vontade hamutuk atu promove sistema justisa ida ne’ebé forte no efisiente, la’ós de’it ba interese bilateral, maibé mós ba estabilidade no dezenvolvimentu iha rejiaun ASEAN. IX Governu Konstitusionál, liuhosi Ministru Justisa Timor-Leste, hakarak hato’o momentu ida-ne’e signifikadu boot tebes”, hateten Governante ne’e.
Iha biban ne’e Ministru Justisa Sergio Hornai hakarak hato’o agradesimentu bo’ot ba ICD no Ministériu Justisa Japaun ne’ebé desde tinan 2009 halo ona kooperasaun ida ne’ebé metin ho Timor-Leste.
“Fó kontribuisaun importante ba konsolidasaun rekursu umanu iha setór justisa, no mós ba fortalese instituisaun sira ne’ebé iha kredibilidade atu asegura no garante direitu fundamentál sidadaun sira nian, liuliu asesu justu no iguál ba justisa”, nia afirma.
Iha serimónia ne’e, Ministru Justisa, Sérgio Hornai, akompaña hos Embaixadora Estraordinária no Plenipotensiária Repúblika Demokrátika Timor-Leste ba iha Japão, Maria Terezinha da Silva Viegas, no mós delegasaun ofisiál hosi Ministériu Justisa Timor-Leste.
Ekipa: Rápides -Info
