Díli, (Rapídes-info)- Lider nasionál na’in lima hanesan eis Prezidente Repúblika í eis Primeiru-Ministru Taur Matan Ruak, eis Prezidente Repúblika, Francisco Guterres Lú Olo, eis Xefe Estadu Maior Jenerál F-FDTL Jenerál Reformadu Lere Anan Timur no eis Ministru Defeza Filomeno Paixão no Atual Xefe Estadu Maior Forsa Armada (XEMFA) hala’o enkontru importante ida iha Farol, Dili.Enkontru ne’e sai hanesan knua ba diálogu estratéjiku entre figura boot sira ne’ebé marka ona istória nasaun nian.
Pontu Esensial hosi sorumutuk ne’e atu hatudu proximidade no amizade entre líder sira hodi ko’alia aberta kona-ba kestaun Estadu nian ho objetivu Sentral: Troka hanoin no ideia fundamentál hodi kontribui ba dezenvolvimentu no estabilidade nasionál iha tempu oin mai.
Reafirma importánsia hosi konsensu no unidade entre lideransa sira hodi hasoru dezafiu nasionál oinsa lori Timor Leste hakat ba oin.
Nune’e mós, lider na’in lima ne’e diskute interese nasaun no unidade nasionál, inklui diskute prepara serimonia 20 Agostu tinan ne’e.
Xefe Estadu Maiór Jenerál Forsa Armada (XEMGFA), Tenente Jenerál Domingos Rau “Falur Rate Laek”, hateten, lider históriku na’in lima hala’o enkontru importante ida iha Farol hodi ko’alia kona-ba interese no unidade nasaun nian, liuliu preparasaun ba serimónia loron 20 Agustu tinan ida ne’e.
Tuír Falur, enkontru ne’e importante tebes tanba lider sira hotu-hotu mak eis titular no balun mos membru Konsellu Superiór Defeza Militar, ne’ebé iha responsabilidade atu fó hanoin no orientasaun kona-ba konseitu serimónia FALINTIL nian ba loron 20 Agustu.
“Ha’u mai hasoru sira tanba sira eis titulares. Ha’u husu sira nia opiniaun no hanoin laran atu depois bele halo konseitu ida ba 20 Agustu tinan ida ne’e,” hatete Falur iha Falor, segunda (11/05).
Nia esplika katak, konseitu serimónia tinan ida ne’e sei diferente ho tinan sira uluk, liuliu iha forma pratika no maneira organizasaun nian.
“Diferensia maka uluk ha’u la mai hasoru sira hanesan agora. Ami uluk toba hamutuk, han hamutuk no luta hamutuk iha ai laran. Agora ami fahe malu ona tanba família, poder no politika. Maibé agora ami halibur malu fali ba interese nasaun nian,” dehan nia.
Falur mos afirma katak, hanoin no kontribuisaun husi lider sira sei sai baze importante ida atu nia bele prepara relatóriu ofisiál ba Governu kona-ba serimónia boot FALINTIL nian iha tinan ida ne’e.
Ekipa Rapídes-info
