Díli, (Rapides-Info)- Primeiru-Ministru (PM), Kay Rala Xanana Gusmão hala’o vizita bá Kampong Ayer Kulturál no Galéria Turizmu iha Brunei Darussalam, tersa 05 Maiu 2026.
Primeiru-Ministru vizita fatin ne’e akompaña hosi Ministru Primeiru Rekursu no Turizmu Brunei Darussalan nian, Dato Seri Setia Dr. Haji Abdul Manaf Hj Metussin.
Kampong Ayer mak fatin ida ne’ebé importante tebtebes bá kultura no istória Brunei nianFatin ne’e mós hanaran “Venice of the East” tanba aldeia ida ne’e harii iha bee leten.
Kampong Ayer iha ninia aldeia barak ne’ebé liga-malu ho ponte ai nian. Iha uma, meskita, eskola, loza no estasaun polísia iha bee leten.
Kulturalmente, Kampong Ayer importante tanba: Sai sentru moris tradisionál povu Brunei durante tinan atus bá atus. Reflete identidade Malay Islam Monarchy (MIB) ne’ebé sai filozofia nasionál Brunei nian. Arte, hahán tradisionál no kustume Brunei barak prezervadu iha ne’ebá.
Turista sira bainhira bá Bandar Seri Begawan, dala barak vizita Kampong Ayer atu haree moris tradisionál iha bee leten.
“Iha mós muzéu ida hanaran Kampong Ayer Cultural and Tourism Gallery ne’ebé hatudu istória, arquitetura, no vida komunidade Kampong Ayer”, haktuir komunikadu ne’ebé rapides-info asesu husi mídia GPM, tersa (05/05).
PM Xanana interresadu tebes tanba fatin ne’e aliende populasaun sira hela, iha mós fatin ne’ebé prezerva fotografia antigu sira Brunei Darussualam nian.
Kampong Ayer maka fatin ida hosi povoasaun bee nian ne’ebé bo’ot liu iha Sudeste Aziátiku, fatin ne’e nu’udár espasu ida ne’ebé vizitante sira liu-liu vizitante estranjeiru sira hakarak pasa tempu iha rai Brunei.
Kampong Ayer goza utilidade modernu sira hanesan eletrisidade, WiFi no TV kabel ho totál populasaun 10.000 ne’ebé hela iha ne’e.
Akompaña Primeiru-Ministru iha vizita ne’e maka Vise Ministra Asuntu ASEAN, Milena Rangel, Sekretáriu Estadu Komunikasaun Sosiál, Expedito Dias Ximenes no Xefe Gabinete Primeiru-Ministru, Elizabeth Exposto.
Ekipa Rapides Info
