BAUCAU, (Rápides -Info)- Suku Bucoli, Munisípiu Baucau, ofisialmente lansa FALINTIL Cup 2026 hanesan parte husi programa komemorasaun Tinan 51 FALINTIL, ho objetivu atu promove desportu, hametin amizade, unidade no patriotizmu entre juventude sira.
Iha serimónia abertura, Xefi Suku Interinu Bucoli, Jaime Lemos da Silva, hatete katak torneiu ne’e la’ós deit kompetisaun futeból, maibé mós sai oportunidade ida atu haburas valor unidade, solidariedade no respeitu malu entre juventude sira.
Nia dehan katak liu husi desportu, komunidade bele hametin koesaun sosiál no kontinua fó onra ba história no luta FALINTIL ba ukun-rasik Timor-Leste.
Komisaun Organizadora FALINTIL Cup 2026, Eufrásio da Silva, esplika katak kompetisaun ne’e partisipa husi ekipa oioin husi Suku Bucoli no área besik, ho objetivu atu buka no dezenvolve talentu futeból lokal, nomós promove espírito fair play, disiplina no responsabilidade entre atleta sira.
Tuir Eufrásio, organizadór sira espera kompetisaun ne’e bele hala’o ho dame no susesu, no sai ezemplu diak ida ba juventude sira atu uza desportu hanesan dalan ida ba dezenvolvimentu pesoál no komunidade.
“Programa komemorasaun ida ne’e reflete mós komprimisu Suku Bucoli atu kontinua promove atividade positivu ba juventude, hodi hametin unidade, patriotizmu no valor nasionál liu husi desportu”, Eufrásio hateten ba Rápides -Info sesta ne’e.
Kompetisaun ne’e envolve ekipa futeból hamutuk 15, ekipa voleibol mane lima no ekipa voleibol feto lima, ne’ebé sei kompete durante programa komemorasaun Tinan 51 FALINTIL.
Ba modalidade futeból, ekipa 15 ne’e fahe ba grupu haat:- Grupu A: Halek FC, Tiger FC, Weles FC no Akadiru FC,Grupu B: Audai Unidos FC, Morba FC, Vita Nova FC no Lapendos FC,Grupu C: Unidade FC, Amizade FC, Laletek FC no The Brothers FC,Grupu D: Rapo A FC, Amizade B FC no Rapo B FC.
Organizadór sira hateten katak, alén de buka kampiaun iha modalidade futeból no voleibol, atividade ida ne’e mós iha objetivu atu haburas talentu atleta lokal, hametin ligasaun entre aldeia sira no inspira juventude atu partisipa iha atividade positivu ne’ebé promove disiplina, responsabilidade, solidariedade no patriotizmu, tuir valor sira ne’ebé FALINTIL husik ba jerasaun foun.
Ekipa: Rápides -Info