Dili (Rápides -Info)-Primeiru-Ministru (PM), Kay Rala Xanana Gusmão, hala’o viajen bá Austrália hodi partisipa iha Festivál Garma, ne’ebé hala’o iha Territóriu Norte Austrália.
PM Xanana Gusmão hetan konvite hosi Yothu Yindi Foundation (YYF), organizadór prinsipál Festivál Garma, ne’ebé realiza tinan-tinan iha Arnhem Land.
“Festivál Garma konsidera hanesan festivál indígena (rai-na’in) bo’ot ida no importante liu iha Austrália”, sita husi komunikadu ne’ebé Rápides -Info asesu sesta ohin.
Eventu ne’e la’ós de’it selebra kultura no tradisaun komunidade indígena Austrália, maibé mós sai plataforma ida atu hametin ligasaun ho povu indígena hosi nasaun sira seluk, inklui Timor-Leste no nasaun Pásifiku sira.
Iha festivál ne’e, Xefe Governu Timor-Leste sei partisipa nu’udár oradór prinsipál (Keynote Speaker) no bainaka espesiál iha enkontru kulturál entre lideransa, komunidade indígena no partisipante sira.
Festivál Garma 2026 hala’o hosi loron 31 Jullu to’o 3 Agostu 2026, iha Gulkula, lokalidade ida iha parte nordeste Arnhem Land, Territóriu Norte Austrália.Organizadu hosi Yothu Yindi Foundation, Festivál Garma aprezenta kultura Yolngu liuhosi tradisaun, knananuk, dansa, konta istória no partilla koñesimentu tradisionál.
Eventu ne’e sai hanesan pontu enkontru importante bá komunidade, família, líder kulturál, artista, foin-sa’e, líder polítiku, akadémiku no reprezentante seitór privadu sira.
Misaun kulturál prinsipál hosi festivál ne’e mak atu kria ambiente ida ne’ebé fó espasu bá espresaun no aprezentasaun sistema koñesimentu no kostume tradisionál Yolngu nian, no fahe pratika sira iha ambiente kulturál autentiku.
Ema rihun bá rihun sei halo viazen bá Arnhem Land iha semana ida-ne’e hodi partisipa iha Festivál Garma.Primeiru-Ministru Kay Rala Xanana Gusmão ho delegasaun sei fila hikas mai Dili iha loron 3 Agostu 2026.
Ekipa Rápides -Info
