Dili, (Rápides -Info)-Governu Timor-Leste liu husi Ministru Administrasaun Estatál (MAE), Tomás do Rosário Cabral, komfirma katak preparasaun ba prosesu transladasaun restu mortais Bispo nain tolu husi Portugál mai Timor-Leste kontinua lao hela, no sei to’o iha TimorLeste iha loron 1 Setembru 2026.
Ministru MAE hatete katak Governu hametin hela koordenasaun ho Konferénsia Episkopál Timorense (CET) kona-ba aspetu hotu-hotu hodi garante prosesu transladasaun ne’e lao ho di’ak.
“Enkontro koordenasaun ohin ne’e entre Governu no Igreja kona-ba preparasaun atu halo transladasaun restu mortais Bispo Timor nain tolu husi Lisboa, Portugál, mai Timor-Leste. Ita hotu hatene katak 1 Setembru besik ona,” hatete Ministru Tomás do Rosário.
Tuir planu, molok transladasaun, iha loron 18 Agostu sei realiza misa agradesimentu iha Portugál ho Timoroan sira, ne’ebé sei prezide husi Bispo Baucau, Dom Leandro Maria Alves.
Iha loron 19 Agostu, sei kontinua ho misa iha Katedral Évora no serimónia entrega husi Estadu Portugál ba Governu Timor-Leste.
Ministru Tomás do Rosário mos hatete katak Komisaun Organizadora halo ona koordenasaun ho autoridade Portugál, inklui kona-ba seguransa durante prosesu husi Igreja ba Aeroportu Lisboa no transportasaun mai Timor-Leste.
Bainhira to’o iha Timor-Leste, restu mortais Bispo nain tolu sei lori tuir programa ne’ebé Governu no Igreja konkorda ona, hahu husi Laleia, Manatuto, no ikus mai Díli. Iha Tasi Tolu, restu mortais sei tau durante loron 10 hodi fó biban ba sarani no komunidade sira halo orasaun no selebra misa.
Bispo nain tolu ne’ebé sei fila mai Timor-Leste mak:
Dom Jaime Garcia Goulart, Primeiru Bispo Diocese Díli (1945–1967);
Dom José Joaquim Ribeiro, Bispo Diocese Díli (1967–1977);
Monsenhor Martinho da Costa Lopes, Administradór Apostóliku Diocese Díli (1977–1983).
Translada restu mortais Bispo nain tolu konsidera hanesan eventu istóriku ida ba Igreja Katólika no povu Timor-Leste, hodi fó omenajen ba sira nia kontribuisaun ba Igreja no nasaun.
Jornalista: Florentina Bianco da Cruz
