AILEU-(Rápides Info)-Autoridade Munisipiu Aileu preparadu simu vizita Primeiru Ministru Kay Rala Xanana Gusmão hodi observa direita ba implementa eleisaun poder lokal ka Governu lokal iha 2027.
Presidente Autoridade Munisipiu Aileu (PAM) João Bosco dos Santos, informa, ohin enkontru hanesan parte importante ida hodi halo preparasaun entre munisipiu ho parte Ministeriu Administrasaun Estatal prepara simu vizita Xefe Governu ho nia delegasaun mai iha Aileu.
“Objetivu husi enkontru ida ohin oinsá atu relata dadus sira neebé mak parte autoridade munisipiu prepara hodi aprezenta iha ámbitu vizita ofisial Primeiru Ministru, tanba husi vizita nee rasik atu observa direitamente projeitu desenvolvimentu sira neebé mak halao ona”, PAM Joao Bosco hateten ba Jornalista Rapides-Info iha salaun I AMA-Aileu, Segunda, (26 /02).
Nia haktuir, vizita PM Xanana nee importante tebes hodi avalia progresu iha infra-estrutura no prestasaun servisu públiku no oinsá envolve autoridade lokál sira, liu husi avaliasaun hirak nee sei determina munisipiu ida neebé mak pronto ona atu tama ba eleisaun municipal iha tinan 2027.
Nunee mos, Sekretariu Estadu Asuntu Toponomia no Organizasaun Urbana (SEATOU), Germano Santa Brites Dias, hatutan, enkontru kordenasaun servisu hamutuk ho estrutura autoridade munisipiu Aileu, iha neebé halo preparativu hodi simu vizita husi PM rasik.
Germano esplika, objetivu husi vizita nee rasik hodi halo avaliasaun ba preparasaun hodi simu poder lokal.
“Iha vizita ofisial ida nee, sei observa direita projeitu PNDS no PDIM, mós haree resultadu munisipiu nian kona-ba implementasaun programa merenda eskolar, saúde nomós agrikultura inklui setór relevante sira seluk, tanba vizita nee atu halo avaliasaun direita ba autoridade munisipiu Aileu nian kona-ba preparasaun sira hodi hakat ba poder lokal”, nia haklean.
Tan nee, Germano mos husu ba diretor servisu municipal jestaun merkadu no turizmu tenki kontrola masimu ba espasu públiku sira no oinsá organiza limpeza jerál hodi kria ambiente neebé mós no organizadu durante vizita ofisial husi xefe governu.
Entretantu, Vice Ministru Administrasaun Estatal (MAE) Jacinto Rigoberto husu PAM ho estrutura sira tenke halo preparasaun masimu hodi simu vizita refere.
Tuir nia, vizita ida nee sei permite Primeiru Ministru, atu observa direitamente projeitu desenvolvimentu sira neebé halao dau-daun ona iha munisipiu Aileu.
Nia hatutan, liu husi avaliasaun nee rasik, sei haree liu ba infra-estrutura no prestasaun servisu públiku nian no envolve ho autoridade lokál sira kona-ba planua prioridade sira ba desenvolvimentu munisipiu nian.
Jornalista : Crispin de J. Amaral
