Dili, (Rápides -Info)-Estrada iha Ermera hahú hetan atensaun husi Governu.
Primeiru-Ministru Kay Rala Xanana Gusmão, hamutuk ho Ministériu Obras Públikas (MOP), ofisialmente lansa fatuk dahuluk ba projetu reabilitasaun estrada husi Kruzamentu Humboe to’o Ermera Lama, Munisípiu Ermera.
Tuir dadus projetu, kontratu ho númeru SSS/067/MOP-2026 iha durasaun implementasaun 365 loron, ho supervisaun husi Ministériu Obras Públikas.
Projetu reabilitasaun ne’e iha montante kontratu hamutuk US$3.348.762,37, no empreza responsavel ba ezekusaun obra mak SALI-MAGU UNIPESSOAL, LDA, empreza Timor-Leste.
Reabilitasaun estrada Humboe–Ermera Lama espera bele fasilita movimentasaun komunidade no transporte merkadoria, nune’e mos hadi’a asesu ba servisu públiku, merkadu no atividade sosial-ekonómika.
Ho hahú projetu ne’e, komunidade iha área refere espera atu hetan infraestrutura rodoviária ne’ebé seguru no di’ak liután, no bele kontribui ba dezenvolvimentu ekonomia no sosial iha Munisípiu Ermera.
Projetu ne’e sei reabilita seksaun estrada ho naruk 5.105,15 metru, ne’ebé lokaliza iha Suku Mertuto no Potete, Postu Administrativu Ermera, Munisípiu Ermera.
Lansamentu fatuk dahuluk ne’e marka hahú ofisial implementasaun projetu ne’ebé nia objetivu atu hadi’a kondisaun estrada, asesibilidade no konektividade ba komunidade sira iha área refere.
Primeiru-Ministru Kay Rala Xanana Gusmão hatete, reabilitasaun estrada ne’e importante atu hadi’a infraestrutura rodoviária no fasilita movimentasaun komunidade.
“Liliu l ba sira ne’ebé depende ba estrada ne’e atu asesu ba servisu no atividade ekonomia”, Primeiru Ministru Xanana Gusmao iha nia intervensaun iha ambitu serimónia lansamentu estrada Humboe ba Ermera Lama iha Suku Humboe Sabadu ne’e.
PM Xanana subliña katak infraestrutura estrada ne’ebé di’ak no seguru sei ajuda fasilita transporte, movimentasaun ema no merkadoria, no mos bele suporta dezenvolvimentu iha área rural.
Ministru Obras Públikas, Samuel Marçal, hatete, Ministériu Obras Públikas sei kontinua halo akompañamentu no supervisaun ba implementasaun projetu atu asegura katak obra hala’o tuir projetu, padraun no prazu ne’ebé determina ona.
Ekipa: Rápides -Info
