Dili, (Rápides-Info)- Komisariu ba komisaun Rekrutamentu Juiz Supremu Tribunál Justisa (STJ) Komisáriu Avalino Coelho no José Pedro Camoes kinta ne’e lori juri internasioná ne’ebé sei fó teste ba kandidatu Juiz ne’ebé sei tuur iha Supremu Tribunál Justisa no Tribunál Rekursu iha semana ne’e ba komprementa Prezidente Repúblika José Ramos.
“Ohin ha’u ho Komisáriu Camoens, ami rua akompana júri hosi Portugal vizita kortezia hodi komprimenta Prezidente Repúblika”, Avelino hateten ba jornalista sira iha Palásiu Prezidensiál kinta ne’e.
Nia esplika, vizita kortezia ne’e importante nu’udar parte husi étika no respeitu ba Xefe Estadu, no atu garante prosesu seleksaun lao nafatin ho prinsipiu imparsiálidade.
“Vizita kortezia ne’e atu garante nafatin imparsiálidade prosesu ne’e tomak, ne’ebé nu’udar étika ita tenke komprimenta ita nia Xefe Estadu,” nia hateten.
Coelho fundsmenta membru júri husi Portugal mai Timor-Leste nu’udar vizitante no belun, maibé iha tempu hanesan sira iha responsabilidade boot nu’udar membru júri iha prosesu rekrutamentu juiz.
“Júri sira mai iha ne’e hanesan visitante, hanesan ita nia belun, maski sira mai hala’o knar nu’udar membru júri ho responsabilidade boot ba prosesu tomak. Maibé nu’udar ita nia sivismu, mak ohin ami akompana sira mai komprimenta,” nia afirma.
Avelino Coelho hatete, Prezidente Repúblika José Ramos-Horta hato’o de’it agradesimentu ba membru júri sira ne’ebé simu vontade atu partisipa iha prosesu seleksaun ba juiz.
Prezidente mós fó agradesimentu ba Supremu Tribunál Justisa Portugal, tanba disponibilidade no abertura atu fahe esperiénsia liuhusi membru júri ne’ebé iha kredibilidade no esperiénsia iha área justisa.
“Prezidente agradese de’it vontade sira nian atu aseita hola parte iha júri. Agradese mós Supremu Tribunál Justisa Portugal ne’ebé mai ho laran luak, bazeia ba ita nia esperiénsia no akordu ne’ebé iha ho Estadu Timor-Leste, hodi hatudu membru júri ho kredibilidade, ho esperiénsia mai sai júri,” Avelino hateten.
Nia subliña prezensa membru júri husi Portugal reprezenta kontribuisaun importante ba Timor-Leste, liuliu iha esforsu atu estabelese no hametin instituisaun Supremu Tribunál Justisa.
Tuir Avelino, esperiénsia no kredibilidade husi membru júri husi Portugal bele kontribui ba prosesu seleksaun ne’ebé lao ho responsabilidade no tuir prinsipiu sira ne’ebé determina ona.
Tanba ne’e Prezidente Repúblika fó agradesimentu no konsidera kontribuisaun husi Portugal nu’udar apoiu importante ba esforsu Timor-Leste atu estabelese no hametin Supremu Tribunál Justisa.
Ekipa: Rápides -Info
