Dili, (Rápides-Info)— Organizasaun Mundiál Saúde (OMS) fó Prémiu Atinjimentu Saúde Públika ba Timor-Leste, nu’udar rekoñesimentu ba susesu nasaun ne’e iha eliminasaun trakoma nu’udar problema saúde públika.
Prémiu ne’e simu husi Ministra Saúde Timor-Leste, Élia A. A. dos Reis Amaral, no aprezenta diretamente husi Diretór-Jerál OMS, Dr. Tedros Adhanom Ghebreyesus, durante 79.ª Sesaun Komité Rejionál OMS ba Sudeste Aziátiku, ne’ebé hala’o iha Dili, Timor-Leste.
Rekoñesimentu ne’e marka momentu importante ida ba setor saúde públika Timor-Leste, liuliu tanba trakoma mak moras infesioza ida ne’ebé afeta matan no sai hanesan kauza infesioza prinsipál ida ba defisiénsia matan iha mundu.
Timor-Leste antes sai nu’udar nasaun ikus iha Rejiaun Sudeste Aziátiku OMS ne’ebé enfrenta trakoma endémiku.
Liuhusi esforsu no intervensaun saúde públika, nasaun ne’e konsege atinji kritériu eliminasaun trakoma nu’udar problema saúde públika.
Validasaun ida-ne’e hatudu katak trakoma elimina ona nu’udar problema saúde públika iha Timor-Leste, no ho rezultadu ne’e, Rejiaun Sudeste Aziátiku OMS tomak atinji ona marka importante ida iha luta kontra moras ne’e.
Ministériu Saúde konsidera rekoñesimentu husi OMS ne’e nu’udar rezultadu husi servisu hamutuk entre Governu, profisionál saúde, komunidade no parseiru dezenvolvimentu sira iha esforsu atu prevene, deteta no kontrola trakoma.
Susesu ne’e mos sai motivasaun ba Timor-Leste atu kontinua hadi’a servisu saúde públika no garante prevensaun moras infesioza sira, liuliu moras ne’ebé bele hamosu defisiénsia no afeta kualidade moris populasaun.
Prémiu ne’e, alende rekoñese esforsu Timor-Leste nian, mos marka imajen pozitivu nasaun ne’e iha nivel internasionál iha área saúde públika.
Ekipa: Rápides -Info
