Dili, (Rápides -Info)- Diretór Ezekutivu Forum Organizasaun Naun Governamentál Timor-Leste (FONGTIL) Inocencio Xavier solisita ba Diresaun Servisu Investigasaun Kriminál (DSIK) no Polísia Sientífika Investigasaun Kriminál (PCIC, sigla Portugés hodi hametin kooperasaun nunee prevene Krime Transnasionál iha Timor-Leste.
“Ba PNTL, DSIC no PSIC Kontinua hametin, kooperasaun institusionál no kapasidade operasionál atu prevene no kombate krime sibernétika no atividade krime organizadu iha Timor-Leste ho Rigor”, Inocencio hateten liuhusi Konferensia Impresa ne’ebé halo iha FONGTIL Kaikoli kinta ne’e.
Nia dehan, FONGTIL respeita independénsia Ministériu Públiku no Tribunal atu foti desizaun tuir Konstituisaun, Kódigo Penál no lei sira seluk ne’ebé aplika, ho konsiderasaun ba direitu fundamentál suspeitu sira no interese públiku atu garante prosesu justisa la’o ho efikásia no transparénsia.
“Ba Ministériu Públiku no Tribunál hala’o prosesu justisa ho independénsia, imparsialidade no transparénsia, no konsidera aplika medida koasaun ne’ebé adekuadu tuir lei, bainhira iha fundamentu legál atu prevene risku halai ses, destroi prova ka perturba investigasaun”, nia afirma.
Inocencio hatutan, FONGTIL ho nia membru no rede setoral sira husu ba Ministériu Públiku no Tribunal atu konsidera didi’ak medida koasaun ne’ebé apropriada tuir lei durante prosesu investigasaun no julgamentu ba suspeitu sira iha kazu Scam Call Centre iha Timor-Leste.
“Pedidu ida-ne’e bazeia ba preokupasaun sira katak, karik la aplika medida koasaun ne’ebé adekuadu, bele iha risku suspeitu halai ses husi Timor-Leste ka difikulta prosesu investigasaun no administrasaun justisa”, nia afirma.
Iha biban ne’e Diretor Ezekutivu FONGTIL kongratula DSIK no PCIC nian servisu ne’ebé desmantela rede krime transnasionál scaming call center iha Dili no munisípiu sira.
“FONGTIL ho nia Membru no Rede Setoral sira hakarak hato’o apresiasaun ba Parte Seguransa, liuliu PNTL, PSIC no DSIC, ba sira-nia servisu, profisionalizmu no komitmentu hodi desmantela atividade jogu ilisitiu ho naran Scam Call Centre iha Timor-Leste”, nia hateten.
Tuir nia, asaun ida-ne’e hatudu katak instituisaun seguransa sira kontinua serbí povu ho responsabilidade no determina atu kombate krime organizadu no krime sibernétika ne’ebé ameasa seguransa, estabilidade Nasaun nian. Maibé FONGTIL mos hakarak dezafia nafatin autoridade sigurnasa atu kontinua halo vijilansia masimu liu husi Kanal seguransa estadu nian atu bele halo metigasaun ba grupu mafiozu sira iha Timor-Leste.
“FONGTIL hein katak esforsu hanesan ida-ne’e bele kontinua hametin, ho koordenasaun di’ak entre instituisaun Estadu tomak, hodi garante ambiente ne’ebé seguru ba sidadaun hotu no prevene atividade ilegál iha Timor-Leste”, nia subliña.
Jornalista: Florentina Biaco da Cruz
