Dill, (Rápides -Info)- Reuniaun Komité Sentrál FRETILIN (CCF) ne’ebé lideradu husi Prezidente Interinu partidu no Sekretáriu Jerál Mari Alkatiri hala’o iha sabadu (29/8) horseik iha sede FRETILIN Komoro dibilibera no deside katak la fó konfiansa ba líder troika FRETILIN Jenerál Lere Anan Timur no prefere iha eleisaun la kandidata figura hodi kompete iha eleisaun prezidensiál 2027.
Desizaun ne’e membru CCF foti bazea ba rezolusaun Nú. 03/CCF-5°/VIII/2026.
“Rezolusaun Nú. 03/CCF-5°/VIII/2026 ne’ebé deklara FRETILIN sei fo prioridade ba Partidu no Povu Timor-Leste no ba ida ne’e sei la aprezenta kandidatura rasik ba eleisaun Prezidensiál tinan-2027”, sita husi komunikadu nee’ebé públiku iha pájina ofisiál Partidu FRETILIN ne’ebé Rápides -Info asesu domingu ne’e.
Iha reuniaun ne’e Komité Sentrál FRETILIN hasai rezolusaun hitu seluk ne’ebé konsidera importante mak hanesan Rezolusaun Nú. 01/CCF-5°/VIII/2026 hodi fo omenajen póstumu ba Saudozu Kamarada Presidente Francisco Guterres “Lú-Olo.”
Rezolusaun Nú. 02/CCF-5°/VIII/2026 ne’ebé marka data ba FRETILIN nia Kongresu Nasionál ba da-6.
Rezolusaun Nú. 04/CCF-5°/VIII/2026 ne’ebé harii Komisaun Nasionál Preparasaun no Organizasaun ba VI Kongres Nasionál FRETILIN nian no Eleisaun Jerál Dahitu.
Rezolusaun Nú. 05/CCF-5°/VIII/2026 ne’ebé lansa kampaña “Militante Nu’udar Baze Apoiu Luta nian” no hahu kontribuisaun solidariu no ho konsiensia hodi militante sira tuir sira nia kbiit atu reforsa FRETILIN.
Rezolusaun Nú. 06/CCF-5°/VIII/2026 ne’ebé aprova Regulamentu Disiplinár FRETILIN nian.
Rezolusaun Nú. 07/CCF-5°/VIII/2026 kona-ba paridade demokrátika no kuota reprezentasaun feto nian, ne’ebé deside hodi hasa’e reprezentasaun feto nian ba 40% iha kargu eletivu hotu-hotu iha FRETILIN nia laran.
Rezolusaun Nú. 08/CCF-5°/VIII/2026 kona-ba Transladasaun Restus Mortais Bispu sira nian mai Timor-Leste hodi saúda inisiativa transladasaun ba saudozu Amu Bispu sira; Dom Jaime Garcia Goulart, Dom José Joaquim Ribeiro, Monsiñor Martinho da Costa Lopes no Dom Alberto Ricardo da Silva.
Iha reuniaun reuniaun CCF ne’e, Sekretariu Jerál no Prezidente Interinu FRETILIN nian, Mari Alkatiri esplika, “reuniaun Komite Central ida ne’e hala’o iha momentu ida ne’ebé krítiku tebes iha Nasaun no partidu nia vida.”
“FRETILIN hakat iha dalan no tempu ida ne’ebé naruk tebes ona no liuhosi mudansa oin-oin iha tempu oin-oin iha faze diferente vida Timor-Leste nian en termus estrutura no polítika sira,” sita husi komunikadu ne’e.
“Ho mudansa iha realidade ohin loron, Komite Central presiza atu diskitu no hare oinsa mak FRETILIN bele moderniza an hodi responde ba mudansa dezafiu hosi ne’e ba oin atu bele kumpriende diak liu povu no nasaun nia problema sira no fo resposta ne’ebé adekuadu,” dehan husi komunikadu ne’e.
Durante reuniaun membru sira Komte Sentrál FRETILIN nian halo diskusaun klean no nota ho preokupasaun boot katak Timor-Leste monu ona iha pegada krime organizadu internasionál no tamba ne’e presiza atu harii konsiensia komum ida kona-ba importansiano urjensia atu salva Timor-Leste hosi situasaun ida ne’e molok sindikatu krime organizadu sira halo State Capture ka domina Estadu Timor-Leste nia orgaun soberania sira.
Ekipa: Rápides -Info
