Díli, 09 Setembru 2026 – Juventude “Molop Gol Unidus” (MGU) realiza enkontru preparatóriu ho objetivu atu prepara no realiza atividade iha Suku Molop, ne’ebé kompostu husi aldeia ha’at, mak Aldeia Molop-Tas, Lonlolo, Omelai no Anapal.
Enkontru ne’e partisipa husi maioria Juventude Molop oan sira ne’ebé dadaun domisilia iha Díli. Enkontru ne’e sai nu’udar espasu atu diskute, fahe hanoin no prepara inisiativa sira ne’ebé sei hala’o iha Suku Molop.
Iha enkontru ne’e, partisipante sira konsege estabelese Komisaun Organizadora, ne’ebé sei lidera husi Sr. Crispin Mali. Komisaun ne’e sei responsabiliza ba planeamentu, koordinasaun no preparasaun atividade sira iha tempu tuir mai.
Iha etapa tuir mai, Komisaun Organizadora sei planu atu hasoru intelektuais Molop oan sira, hodi aprezenta inisiativa no planu atividade ne’ebé Juventude “Molop Gol Unidus” prepara ona.
Enkontru ho intelektuais ne’e importante atu envolve sira iha prosesu ida ne’e, hodi sira bele kontribui ho koñesimentu, esperiénsia, hanoin no kapasidade ba dezenvolvimentu komunidade Molop.
Juventude “Molop Gol Unidus” (MGU) konsidera enkontru ne’e hanesan pasu importante ida atu hametin unidade, solidariedade, kooperasaun no partisipasaun juventude husi aldeia ha’at: Molop-Tas, Lonlolo, Omelai no Anapal.
Ho espírito unidade no servisu hamutuk, MGU sei kontinua promove inisiativa sira ne’ebé bele fó kontribuisaun pozitivu ba komunidade no futuru Suku Molop.
Kredit Foto: Pájina Tiu Jo
