Díli, (Rapídes-info)- The Japan-Australia Business Co-operation Committee (AJBCC) hato’o interese atu apoia dezenvolvimentu ekonómiku Timor-Leste (TL) liu-hosi loke sentru formasaun iha área negósiu.
Prezidente The Japan-Australia Business Co-operation Committee, Michiaki Hirose hato’o direta interese ne’e bá Primeiru-Ministru (PM), Kay Rala Xanana Gusmão, iha Palásiu Governu.
Michiaki Hirose hateten, sei serbisu hamutuk ho Timo-Leste ba kooperasaun triparti hodi Reforsa dezenvolvimentu área prinsipál sira hanesan ekonomía no negosiu iha futuru. Nune’e, haksolok tebes hasoru Primeiru-Ministru Kay Rala Xanana Gusmão hodi ko’alia kona-bá relasaun nasaun rua nian iha area ekonómia no negosiu nian.
“Ohin, kontente tebes hasoru-malu ho Primeiru-Ministru hodi ko’alia kona-bá kestaun ekonomia Japaun no Timor-Leste nian. Ami hato’o interese atu loke formasaun kona-bá negósiu iha TL,” Michiaki Hirose hateten ba jornalista sira iha Palasio Governu, tersa (12/05).
Timor-Leste ho Japaun iha relasaun amizade ne’ebé forte tebes no estabelese ona kooperasaun iha área oioin, maibé The Japan-Australia Business Co-operation Committee mós iha interese hakarak apoia hodi hadi’a di’ak liu-tán área negósiu nune’e hamutuk dezenvolve liu-tán ekonomia TL.
AJBCC estabelese ho vizaun jerál ida maka promove no hasa’e oportunidade negósiu no hametin ligasaun entre Austrália ho Japaun bá benefísiu membru sira no mós komunidade internasionál.
Michiaki Hirose hatutan desde uluk kedas japaun no Timor-Leste iha relasaun ne’ebé forte iha área negosiu nian tanba ne’e kontinua halo nafatin koperasaun atu apoiu deznnvolvimentu no hasa’e kreximentu ekonómiku Timor-Leste nian iha futuru.
“Ha’u nu’udar prezidente komite kooperasaun Austrália nian ha’u rona katak Timor-Leste ho japaun sira iha relasaun ne’ebé forte tebes iha área negosiu nian tanba ne’e ha’u hakarak reforsa kooperasaun ida ne’e entre Japaun, Austrália no Timor-Leste iha Futuru,” Nia subliña.
Nia mós haktuir katak, sei iha oportunidade barak ne’ebé nasaun rua bele explora iha futuru konserteza iha área balun inklui enerjia iha futuru.Harii iha tinan 1962 atu promove liu-tán kooperasaun entre nasaun rua no sira nia komunidade emprezariál sira.
Enkontru ne’e Prezidente The Japan-Australia Business Co-operation Committee, Michiaki Hirose akompaña hosi Embaixadór Japaun iha TL, Yayushi Yamamoto.
Ekipa Rapídes-info
