Dili, (Rápides -Info)-Mari Alkatiri ho familia presta omenajen ba falesimentu Saudozu Antigu Prezidente Repúblika Francisco Guterres Lú-Olo iha nia rezidénsia Farol molok lori sai ba iha sede Komité Sentrál Frente Revolusionariu Timor-Leste Independente (FRETILIN) iha Komoro.
Mari Alkatiri ho nia Espoza oan sira inklui seguransa Pesoál hakat mai Saudozu Lú-Olo nia uma presta omenajen iha sesta (26/6) ohin porvolta tuku 07:00.
Hafoin presta tiha omenajen ba Saudozo Francisco Guterres Lú-Olo, lori sai kedan husi uma Farol mai iha CCF hodi fó ultimu omenjen.
Tuir observsaun Rápides -Info iha terenu bainhira maktoban Saudozu Francisco Guterres Lú-Olo sai husi uma Farol hetan akompañamentu husi ema wain ba wain.
Tuir sikuensia ne’ebé mak iha katak hafoin presta tiha omenajen iha CCF sei lori ba iha maktoban antigu Prezidente Repúblika Francisco Guterres Lú-Olo ba kuartel Jenerál F-FDTL Fatuhada hodi presta omenajen iha minutu balun nia laran molok lori ba Palásiu Prezidente Ai-laran hodi presta omenajen.
Hafoin ne’e sei lori Saudozu maktoban antigu Prezidente Repúblika Francisco Guterres Lú-Olo ba Igreja Katedral Dili hodi halo misa reken iha Igreja Katedral Dili.
Hafoin ida ne’e sei lori Saudozu Francisco Guterres Lú-Olo nia kavér ba Parlamentu Nasionál hafoin ida ne’e transporta ba Metinaru hodi haloot maktoban antigu Prezidente Repúblika Francisco Guterres Lú-Olo iha Jardín Eróis Metinaru.
Jornalista: Florentina Biaco da Cruz
