Dili (Rápides Info)- Vise Primeiru Ministru no Ministru Koordenadór Asuntu Ekonómia no Ministru Turizmu no Ambiente Francisco Kalbuadi Lay lori Governu Timor-Leste nia naran parabeniza sidadaun Xineza ne’ebé iha Timor ne’ebé iha tersa ohin selebra tinan foun Xineza nian.
Selebrasaun tinan foun Xina ne’e sidadaun Xineza ne’ebé rezidente iha Timor-Leste halibur hamutuk iha fatin Xina Maromak Formoza tersa ne’e maizu menus tuku 8:00 halao rituál sambaian nudar jestu kultura no identidade Xina nian.
Hafoin ida ne’e sira hatudu dansa atuasaun ne’ebé bolu naran Baron Saida hodi anula komunidade Xineza no partosipante sira iha fatin ne’e.
Hafoin remata ida ne’e sira ba iha Embaixada Xina iha Timor-Leste Praia dos Cuqueiros Dili hodi kompreneta Embaixadora Xina iha Timor-Leste Wang Wenli nu’udar jestu ida husi kultura Xinez sira bainhira selebra tiha loron tinan foun, tenke ba komprimentu malu.
Vise-Primeiru-Ministru Francisco Kalbuadi Lay mós marka prezensa iha selebrasaun ne’e no lori Governu konstitusionál dasia hato’o boas festa ba Embaixadora Wang Wenli no komunidade Xineza sira ne’ebé iha Timor-Leste.
“Ha’u husu ba Nai Maromak atu tulun ita hotu-hotu. Amu Papa Francisco mós fó hela lia-fuan kona-ba fraternidade umana, katak iha loron saida deit ita bele festeza hamutuk nudar ema ida deit.Ha’u mai hato’o boas festa ba Embaixadór ho nia ekipa no komunidade Xineza iha Timor-Leste,” hateten Kalbuadi Lay hateten ba jornalista sira hafoin partisipa serimónia selebrasaun tinan foun Xina iha Embaixada Xina Praia dos Cuqueiros tersa ne’e.Nia dehan, delebrasaun Tinan Foun Xineza iha Timor-Leste ne’e hatudu toleránsia relijioza, diversidade kulturál no relasaun amizade ne’ebé metin entre povu Timor-Leste no povu Xina.
Iha fatin hanesan Embaixadora Xinaza mai Timor-Leste, Wang Wenli hateten selebrasaun tinan foun Xina nian tinan ne’e hakarak dedika oinsa hametin no haforsa koperasaun Xina ho Timor-Leste ba iha futuru.
Nia realsa lori komunidade Xineza iha Timor-Leste hato’o haksolok iha tinan foun Xina nian, espera selebrasaun tinan foun ida ne’e komunidade xina iha Timor-Leste bele moris iha paz estabilidade nia laran hodi kontribui ba prosesu dezenvolvimentu iha Timor-Leste.
“Husu ba sidadaun Xineza iha Timor-Leste hodi hametin kultura no indentidade promove pás iha Timor-Leste,” nia afirma.
Nune’e mós Prezidente Asosiasaun Komersiál Komunidade Xineza iha Timor-Leste (ACCCTO, sigla Portugés ) Kathleen Gonçalves hateten katak komunidade Xineza konta ho ema hamutuk rihun 20 iha Timor-Leste, no hamutuk ho komunidade Xineza sira iha mundu ne’ebé to’o millaun 2- resin, selebra festa pasajen tinan foun Xineza ho alegria festival Primavera ba Timor-Leste.
“Ita hotu hatene katak komunidade Xineza hamutuk iha selebrasaun ano novo Xineza nian, lori alegria Festival Primavera mai iha ita nia rai laran, no mós iha selebrasaun tinan foun ne’e Asosiasaun Komersiál Komunidade Xineza iha Timor-Leste hakarak kontinua halo koperasaun ekonómika, komersiál no kulturál ho Timor-Leste,”nia hateten.
Nia hatutan, iha Timor-Leste, komunidade Xineza konsidera loron ne’e hanesan loron espesiál tebes. Maibé, to’o agora seida’uk sai feriadu públiku ofisiál ba komunidade Xineza, maski iha Timor-Leste komunidade relijiozu sira hanesan komunidade Islamiku hetan ona loron rua feriadu públiku.
“Loron Tinan Foun Xineza hetan toleránsia di’ak, maibé ami mos hatama ona karta ba Parlamentu no Governu atu husu bele tau atensaun no importánsia ba loron ida ne’e,” nia afirma.
Prezidente ACCCTO husu ba komunidade Xineza sira kontinua servisu ho didi’ak no kontribui ba dezenvolvimentu nasaun Timor-Leste. Nia mos apela ba membru komunidade sira ne’ebé envolve iha setor konstrusaun atu fó prioridade ba serbisu ne’ebé iha kualidade no responsabilidade.
Ekipa Rápides Info
