Dili (Rápides Info)-Sekretáriu Estadu Komunikasaun Sosiál (SEKOMS) Expedito Dias Ximenes hamutuk ho Asosiasaun Jornalista Timor-Leste (AJTL) fasilita forum dijitál literasia artifisiál intelijénsia ba estudante sira atu uza média sosiál ho responsabilidade.
Estudante sira ne’ebé tuir forum dijitál literasia artifisiál intelijénsia husi eskola 30 de Agusto, 4 de Setembro nomós São José Operario.
SEKOMS apoiu fundu ba Asosiasaun Jornalista Timor-Leste ho $8.000 hodi organiza workshop forum literásia vdujitál artifisiál intelijénsia ba estudante sekundária.
Sekretariu Estadu Komunikasaun Sosial (SEKOMS) Expedito Dias Ximenes, informa, objetivu husi forum dijital ida ne’e atu hasae koñesimentu estudante sira atu nune’e hasa’e koñesimentu estudante sira nian kona-ba mundu dijitalizasaun iha era ohin loron nian.
“Pontu importante ne’ebé ohin ita ko’alia iha ne’e, kona-ba literasia dijitál, iha ne’ebé oinsá joven sira hanesan future no esperansa ba nasaun nian bele uza média sosial ho plataforma sira ne’ebé iha hanesan facebook, tiktok, twiter, youtube no google, ho plataforma hirak ne’e uza tenke iha responsabilidade, tanba ita hotu hatene ho avansu teknolojia dalabarak ita ne’ebé iha telefone la uza ho di’ak hodi partilla informasaun sira ne’ebé fake news ka notísi falsu,”Expedito hateten ba jornalista sira hafoin abertura forum literasia artifisiál intelijénsia ba estudante sekundária iha salaun Asosiasaun HAK Faról kinta ne’e.
Governante ne’e hateten, liuhusi IX Governu ne’ebé mak tutela hodi servisu hamutuk ho AJTL, atu bele fasilita formasaun ba joven inklui estudante sira hasa’e abilidade no koñesimentu hodi uza média sosiál ho responsabilidade.
Tanba ne’e, liuhusi workshop ida ne’e bele fasilita joventude no estudante sira hodi minimiza ka redus informasaun hoax sira iha Timor-Leste, tanba informasaun balu dala ruma fó sai la konfirma ho diak kona-ba informasaun ne’e rasik loos ka lae.
“Entaun husi atividade sira hanesan ne’e ita bele kapasita ona joven ho estudante sira oinsá atu toma responsabilidade ba informasaun saida deit mak iha. Ita hotu hatene oras ne’e dadaun avansu ho teknolojia ne’ebé lalais tebes no mosu tan sistema teknolójia foun ida ho naran artifisiál intelijénsia, tanba ne’e mak iha forum dijitál ne’ebé lao durante ne’e ita ko’alia mós kona-ba vantajen no dezvantajen iha artifisial intelijénsia, liuhusi artifisial intelijénsia fó vantajen ba ita”,nia afirma.
Sekretáriu Estadu Komunikasaun Sosiál ne’e realsa husi formasaun ne’e buat balu ne’ebé aprende husi ne’e, mós bele fó desvantajen ho informasaun falsu ne’ebé artifisial intelijésia.
“Tanba ne’e liuhusi formasaun sira ne’e importante tebes ba joven no estudante sira atu bele kapasita sira nia abilidade no koñesimentu oinsá bele uza média sosial ho plataforma sira ne’ebé iha ho diak no responsabilidade”, nia hakotu.
Iha fatin, Prezidente AJTL Zevonia Veira relata, Asosiasaun Jornalista Timor-Lorosa’e hetan apoiu fundus husi Sekretariu Estadu Komunikasaun Sosiál hodi fasilita forum dijitál ba literasia no mós artifisiál intelijénsia ba estudante sira husi eskola 30 de Agusto, 4 de Setembro nomós São José Operario.
“Husi workshop ne’e rasik bele fahe hanoin kona-ba importansia husi literasia dijital nomós atu hasa’e koñesimentu ba Intelejensia Artifisiál ba estudante sira, atu nune’e sira bele komprende hodi hasa’e sira nia abilidade ba iha era dijitalizasaun ohin loron nian”,nia afirma.
Nia esplika, agora dadaun Timor-Leste adere ona ba memebru organizasaun Sudeste Aziátiku (ASEAN) tanba ne’e mak liuhusi atividade sira hanesan ne’e hodi eleva koñesimentu no abilidade ba estudante no foinsa’e sira oinsá uza internet saudavel.
Nia hatutan, oradór ba workshop ohin loron nian mai husi panelista PDHJ, IA no AJTL, iha ne’ebé sei ko’alia kona-ba perspetiva diretu umanus no direitu dijital, atu nune’e oinsá mak foinsa’e sira nia direitu iha pratika mundu dijitál, atu nune’e oinsá protese-an no kontra bulim, alende ne’e mós oinsá sira bele espresa diretu ba Liberdade espresaun iha plataforma dijitál.
“Husi peskizadór Intelejente Artifisiál sei aprezenta mós kona-ba impaktu ba joven sira ne’ebé mak utiliza média sosiál iha era dijitalizasaun ohin loron nian, alende ne’e mós husi AJTL, rasik sei sosializa kona-ba importansia literasia dijitál ba foinsa’e sira oinsá sira utiliza plataforma dijita’ál ho di’ak no saudavel”, nia relata.
Zevonia hateten, forum ida ne’e importante tanba presiza hasa’e estudante no fonsa’e sira- nia koñesimentu no abilidade iha eskola.
Jornaslista: Crispin de Jesus Amaral & Samuel Pereira Menezes
